Полицијата во германскиот град Ремшајд застрела 42-годишен маж во средата вечерта околу 21 часот, откако тој претходно ги нападнал полициските службеници на улицата Паулштрасе.
Како што соопштија Јавното обвинителство на Вупертал и Полициската управа во Хаген, сведоци претходно пријавиле дека мажот им се заканувал на две девојки со бибер спреј, пренесува WDR.
Според истражните органи, кога полицајците му се приближиле, мажот одеднаш испрскал бибер спреј во нивен правец и се дал во бегство.
Службениците прво употребиле пиштол за зашеметување за да го спречат, но не успеале да го погодат.
По ова, 42-годишникот почнал да фрла алатки кон полицајците, по што еден од нив испукал куршум од службениот пиштол и го застрелал. И покрај веднаш започнатата реанимација, тој починал на местото на настанот.
За да се обезбеди целосна непристрасност, случајот и употребата на огненото оружје не ги истражува полицијата во Ремшајд, туку истрагата ја презеде крими-полицијата од Хаген.
Овој случај ја отвори и статистиката на Министерството за внатрешни во Северна Рајна-Вестфалија, која покажува дека во периодот меѓу 2020 и 2024/25 година полицијата испукала вкупно 90 истрели кон луѓе, при што 19 лица биле убиени, а 58 повредени.
Покраината Северна Рајна-Вестфалија бележи надпросечен број на вакви престрелки, каде се случуваат околу една третина од сите смртни случаи од полициски куршуми во Германија, иако таму живеат само 22 отсто од населението.
По рекордните седум смртни случаи во 2024 година, статистиката за 2025 година покажува намалување на два смртни случаи, додека најмалку 18 лица биле повредени во судири со полицијата.