Додека СДС со години зборуваа за реформи, Владата предводена од ВМРО-ДПМНЕ испорачува конкретни резултати, наведува ВМРО-ДПМНЕ во соопштение.
-Преку исполнување на чекорите од Реформската агенда, досега се обезбедени 31,7 милиони евра од Планот за раст, токму во делот на дигиталната трансформација. Овие средства не се добиени по случајност, ниту поради празни политички ветувања. Тие се резултат на сериозна работа, исполнети реформи, донесени законски решенија и јасна политичка волја државата конечно да се движи напред. Дигиталната трансформација не е парола, туку реална промена која значи побрзи услуги, помалку бирократија, пократки процедури и институции кои работат во интерес на граѓаните. Во 2025 година беше донесен најобемниот пакет закони во областа на дигиталната трансформација, со што беа поставени темелите на модерна, ефикасна и европски усогласена држава. Овој реформски процес продолжува со истото темпо и во наредниот период, со цел целосно исполнување на Реформската агенда, велат од владејачката партија.
Велат дека разликата денес е повеќе од очигледна.
-Наместо застој и блокади, има напредок. Наместо изговори како во минатото и владеењето на СДС, сега има резултати. Наместо декларативни заложби, има реформи кои носат европски средства и директна корист за граѓаните. ВМРО-ДПМНЕ нема да дозволи Македонија повторно да се врати во период на неработење и пропуштени можности. Владата предводена од ВМРО-ДПМНЕ ќе продолжи со реформи, инвестиции и дигитализација кои ја прават државата поефикасна, поконкурентна и вистински сервис на граѓаните. Македонија забрзува, завршуваат ВМРО-ДПМНЕ.