Рускиот претседател Владимир Путин нареди зголемување на бројот на вработени во централниот апарат на Федералната служба за заштита (ФСО). Ова е четврти пат Путин да нареди проширување на оваа служба откако ја започна инвазијата на Украина.
ФСО е директно одговорна за безбедноста на највисоките државни функционери, на претседателот и на неговото семејство, како и на најтесниот круг соработници на Кремљ, објави „Ди Телеграф“.
Според новиот декрет, максималниот број на вработени во централниот апарат ќе се зголеми од 785 на 812 лица. Пред инвазијата на Украина, овој оддел немаше промени во персоналот речиси 13 години.
Покрај обезбедувањето на резиденциите и придружбата при патувања, членовите на службата управуваат со државните комуникации, го следат јавното мислење и спроведуваат мерки за информациско војување. Се верува дека целата служба има повеќе од 50.000 вработени.
Европските разузнавачки агенции проценуваат дека од почетокот на годинава се воведени построги безбедносни протоколи поради заканите од беспилотни летала со долг дострел, како и од можен државен удар или атентат.
На вработените што работат во непосредна близина на Путин наводно им е забрането да користат мобилни телефони, уреди со интернет и јавен превоз. Извори за Телеграм каналот „Можем Објаснит“ тврдат дека од средината на април на службениците им е наредено да ги отстрануваат дури и рачните часовници во присуство на претседателот.
Службата во ФСО низ годините се покажа како отскочна штица кон високи политички позиции во Кремљ. Пример за тоа е Алексеј Дјумин, поранешен телохранител на Путин, кој напредуваше до заменик-министер за одбрана, а од 2024 година служи како секретар на Државниот совет.
И покрај строгите правила, медиумите во минатото открија и безбедносни пропусти. Во 2024 година, новинарите на „Ле Монд“ успеаја да ги следат движењата на рускиот претседател користејќи податоци од фитнес апликацијата „Страва“, која ја користеле дел од вработените во ФСО.
Овие снимени рути го поврзаа рускиот лидер со два луксузни имоти на Црното Море и во Карелија за кои тој негираше дека ги поседува, а беа откриени и движења на безбедносниот персонал пред тајната средба со Ким Џонг Ун во Благовешченск.