Првиот ден од јули донесе нагло заладување во највисоките региони на Алпите, каде по рекордно високите температури во јуни, беа забележани обилни врнежи од снег. Продорот на студен фронт ја спушти снежната граница на 2.800 до 3.000 метри надморска височина, покривајќи ги со нов снег бројните алпски врвови и глечери во Швајцарија, северна Италија, западна Австрија и Германија.
Во некои скијачки центри и населби на голема надморска височина наврнаа локално и до 20 сантиметри нов снег, додека пониските предели беа погодени од силни бури, силен ветер, град и обилни дождови.
Метеоролозите појаснуваат дека ваквите појави не се целосно необични за местата над 3.000 метри надморска височина, како што е локацијата Јунгфраујох на 3.454 метри, каде температурите често остануваат под нулата во текот на целата година.
Овој ненадеен налет на студен воздух пристигна од Атлантикот и ја спушти температурата во централна и западна Европа за околу 15 степени.
Пресвртот се случува само неколку дена по историскиот 15-дневен топлотен бран во кој Швајцарија, Германија и Франција забележаа рекордно високи температури за јуни.
Во западните делови на Франција беа измерени рекордни 44 степени, во Германија и Полска 41 степен, додека во Париз живата во термометарот достигна 40 степени. Во швајцарскиот град Базел беа регистрирани 39 степени, а невообичаени 36 степени беа измерени и во Лондон.
Експертите предупредуваат дека климатските промени директно придонесуваат за сè почести и поинтензивни временски екстреми, кои се движат од рекордно високи температури до ненадејни налети на студен воздух и бури.
И покрај тоа што снегот на почетокот на јули е невообичаен за поголемиот дел од континентот, туристите во планинските центри деновиве имаа можност да уживаат во вистински зимски пејзаж среде лето.