Градоначалникот на Град Скопје, Орце Ѓорѓиевски, заедно со градоначалникот на Општина Бутел, Дарко Костовски, го најавија почетокот на реконструкцијата на двете клучни сообраќајници во овој дел на Скопје.
Проектот опфаќа реконструкција на повеќе од 2,2 километри улици, каде ќе биде поставен нов асфалтен коловоз, како и обнова на речиси 4 километри тротоари за пешаците.
Како клучна фаза од градежните работи се наведува изградбата на нова атмосферска канализација во должина од 1.200 метри и одвојувањето на фекалната од атмосферската мрежа.
Ѓорѓиевски истакна дека со оваа инвестиција трајно се решаваат долгогодишните проблеми со инфраструктурата кои го отежнуваа секојдневието на жителите.
„Зборот е збор – започнува реконструкцијата на улиците „Бутелска“ и „Радишанска“ во Бутел! Она што со Дарко Костовски го ветивме пред бутелчани, а со години беше едно од најголемите барања на жителите, наскоро станува реалност. Уште едно ветување преминува во дело“, изјави Ѓорѓиевски.
Тој потенцираше дека новата комунална мрежа значително ќе го намали ризикот од поплавување на улиците, домовите и деловните објекти при обилни врнежи.
„Реализираме инфраструктурни проекти кои не го менуваат само изгледот на улиците, туку го менуваат квалитетот на животот на граѓаните. Создаваме побезбедни сообраќајници, подобри услови за пешаците и современа комунална инфраструктура каква што бутелчани заслужуваат“, додаде тој.
Дополнително, најавено е дека во завршна фаза е и изградбата на новиот мега-парк во оваа општина, кој треба да функционира како нова зелена зона во Скопје.
„За Бутел ме врзуваат многу спомени, но уште повеќе ме врзува обврската да работиме посветено, чесно и со резултати. За Бутел и за Скопје имаме сериозни проекти, јасна визија и силна волја да го подобриме животот на нашиот народ“, порача Ѓорѓиевски.