Европската унија ќе го дополни буџетот на Министерството за образование и наука со 19,2 милиони евра, како резултат на реализираните обврски од домашната Реформска агенда. Средствата се наменети за продолжување на започнатите образовни реформи во државата.
Министерката за образование и наука, проф. д-р Весна Јаневска, изрази задоволство од партнерскиот однос со Владата и европските институции.
„Кон преземените обврски преку Реформската агенда, пристапивме одговорно и работевме посветено. Така и ќе продолжиме. Резултатот е евидентен и јас сум задоволна од досегашната исполнетост на поставените цели, за што, сакам да им се заблагодарам на Владата и институциите со кои партнерски работевме и секако на Европската унија која ќе го дополни буџетот на МОН со 19,2 милиони евра, со кои ќе ги продолжиме образовните реформи.“
Јаневска посочи дека во делот на човечкиот капитал успешно се заокружени три клучни реформи во основниот и средниот сегмент.
Како дел од процесот, над 160 основни училишта во земјава веќе се дигитализирани и опремени со безжична мрежа и современа ИТ опрема.
„Во областа на човечкиот капитал, Министерството за образование и наука успешно ги реализираше трите клучни образовни реформи. Над 160 основни училишта опремивме со безжична опрема и современи ИТ алатки, кои овозможуваат безбеден пристап до интернет.Имплементиравме нова методологија за финансирање на основното образование, почнувајќи од оваа буџетска 2026 година со што обезбедивме повеќе средства и нивна правична распределба кон училиштата. Третата мерка е исполнета предвреме – усвоен е нов модел на финансирање на средното и стручното образование, исто така применет од почетокот на оваа тековна буџетска година.“
Дополнително, од оваа буџетска година веќе се применуваат и новите пресметки за финансирање на средното и стручното образование во Македонија.
Крајната цел на овие инвестиции, според најавите, е создавање на поквалитетен и европски ориентиран образовен систем за учениците.
„Продолжуваме понатаму до целосно исполнување на сите преземени обврски во Реформската агенда, а тие подразбираат инвестиции во поквалитетно и европски ориентирано образование“, рече Јаневска.