Полициски сили и единици на Националната гарда на Русија воведоа 24-часовни дежурства на бензинските пумпи во Иркутската област за да ги контролираат редовите и да спречат складирање бензин. Ваквата мерка следува по прогласувањето на режим на зголемена готовност поради сериозен недостиг на нафтени деривати, предизвикан од украинските напади врз руските рафинерии.
Локалните власти потврдија дека состојбата на терен е критична и дека веќе се спроведуваат првите казни за шпекулативна препродажба.
„Ситуацијата со горивото во градот останува напната“, рече заменик-градоначалникот на Иркутск, Сергеј Гаврин. Тој додаде дека многу возачи се обидуваат да се снабдат со бензин, што дополнително го забавува сообраќајот на станиците. Гаврин потврди дека полицијата ќе остане на бензинските пумпи 24 часа на ден за да го следи почитувањето на ограничувањата.
Проблемот со снабдувањето не е лоциран само во Сибир, туку се шири низ повеќе руски региони, вклучително и во Москва, откако со беспилотни летала беше онеспособена околу една четвртина од вкупниот рафинериски капацитет на земјата. На државните пумпи на „Роснефт“ во Иркутск лимитот е 50 литри дневно по возило, додека во Забајкалскиот крај е скратен на само 15 литри.
Првиот човек на Русија призна дека постојат тешкотии, но уверува дека тие не се од драматични размери.
Рускиот претседател Владимир Путин призна дека нападите врз енергетската инфраструктура создале проблеми со снабдувањето со гориво. Тој рече дека има недостиг, но дека, според него, тој не е критичен. Додаде дека приоритет е зајакнување на воздушната одбрана и заштита на снабдувањето со гориво, особено во окупираниот Крим.
Паралелно, вонредна состојба е прогласена и на полуостровот Крим каде цивилите речиси и не можат да купат гориво, бидејќи приоритет имаат јавните служби. Од друга страна, официјален Киев потврдува дека енергетскиот сектор останува нивна главна цел.
Украинскиот претседател Володимир Зеленски рече дека нападите врз руските рафинерии се дел од напорите за намалување на воените ресурси на Русија. Тој ги осуди руските „напади врз самиот живот“ и рече дека Украина ќе одговори „прецизно, а не како терористи“.