Романскиот град Тулча е ставен во состојба на тревога откако остатоци од дрон со експлозивно полнење беа пронајдени на поле во близина на селото Рашелу, во општина Лунчавица.
Делот од дронот бил пронајден од локален жител во понеделникот, а уредот бил детониран рано утрово од страна на специјализиран тим експерти од Министерството за одбрана.
Властите одлучиле да го детонираат дронот во контролирани услови на самото место, сметајќи дека е премногу ризично уредот да се поместува поради можноста од неконтролирана експлозија.
Според првичните информации, најверојатно станува збор за руски дрон кој влегол во романскиот воздушен простор, а случајот веднаш го презеде Обвинителството при Апелациониот суд во Констанца.
Жителот кој го пронашол сомнителниот предмет веднаш го алармирал системот за итни повици на бројот 112, по што следувала брза реакција на надлежните.
„Специјализирани тимови на Министерството за национална одбрана и други институции од областа на националната безбедност и одбрана пристигнаа на местото на настанот и интервенираа според процедурите, проценувајќи ги ризиците и обезбедувајќи го периметарот“, се вели во официјалното соопштение на Министерството за национална одбрана.
Прелиминарните резултати од истрагата покажуваат дека пронајдените делови потекнуваат од дрон што Руската Федерација го кориснела во нападите врз украинската пристанишна инфраструктура во април 2026 година.
Официјалните податоци откриваат дека од почетокот на војната во Украина, регистрирани се над 100 напади врз цели лоцирани во близина на границата со Романија.
Во овој контекст, досега се пријавени 29 неовластени упади на руски беспилотни летала во романскиот воздушен простор, а фрагменти се идентификувани на нивна територија во приближно 50 случаи.
Само во текот на 2026 година, регистрирани се 33 напади во близина на границата, при што во 26 случаи биле кренати авиони на воздушната полиција за следење на воздушниот простор.