Македонската поп-пејачка Елена Ристеска преку емотивна објава на социјалните мрежи се збогуваше со Владо Јаневски, кој почина по кратко боледување.
Ристеска се присети на нивните приватни дружења, заедничките теми и на неговиот специфичен карактер.
„Ќе ми недостигаш Владе, ќе ми недостигаат нашите разговори за книги и автори, за музика, за животот, за нашата професија, нашите дружби… Ќе ми недостигаш таков терсене каков што беше и баш заради тоа уникатен. Ќе ми недостига хуморот кој ретко го прикажуваше пред други“, напиша Ристеска.
Таа откри дека нивната последна средба на кафе поминала во планови за следни разговори кои, за жал, нема да се остварат.
„Иако се видовме на кафе пред неколку месеци, пак останавме недоречени, ама договорени да се доискажеме на следна средба која очигледно нема никогаш да се случи. :((( Фала ти за сѐ, за секој совет, за секој збор и мудрост, за секоја средба, за секоја книга споделена, за секоја песна…“, додава пејачката.
На крајот од својата порака, Ристеска се осврна на големата празнина што се создава на домашната сцена по заминувањето на големите имиња.
„И која песна да ја ставам сега кога секој текст ти е генијален и совршен… Можеби Булки е правата за овој момент. За жал многу музичари се собравте на таа страна, а многу болка оставивте на оваа… Ах Владе.. многу брзо замина, без збогување. П.С.Никогаш не ти споделив дека како дете “Корпичка” ми беше омилена песна“, завршува Ристеска.