Франција регистрираше околу 1.000 дополнителни смртни случаи за време на рекордниот топлотен бран што ја зафати Европа, соопшти француската агенција за јавно здравје.
Според прелиминарните податоци на надлежните институции, најголем дел од жртвите се лица постари од 65 години, но здравствените власти предупредуваат дека конечниот биланс најверојатно ќе биде значително повисок.
Главната причина за ваквите црни прогнози е што сè уште не се обработени сите податоци од домовите за стари лица и приватните домаќинства, каде што дополнително се очекува да бидат регистрирани нови смртни случаи.
Европа изминативе денови се соочува со еден од најекстремните топлотни бранови досега. Ова невреме предизвика рекордно високи температури, прекини во снабдувањето со електрична енергија, оштетувања на инфраструктурата и десетици жртви во повеќе земји.
Научниците оценуваат дека топлотниот бран, кој започна на 20 јуни, е најсилниот досега забележан на европскиот континент, кој инаку се загрева побрзо од светскиот просек.
Иако екстремните температури постепено се повлекуваат кон источниот дел на Европа, делови од североисточна Франција и понатаму остануваат под метеоролошки предупредувања.
Состојбата ја следат и највисоките владини претставници, кои апелираат на максимална претпазливост кај населението во следниот период.
Француската министерка за здравство, Стефани Рист, предупреди дека здравствените последици од екстремните горештини можат да траат и до десет дена по намалувањето на температурите, нагласувајќи дека кризата сè уште не е завршена и дека високите температури претставуваат ризик за сите граѓани, а особено за повозрасните и хронично болните лица.