Спасувачките екипи во Венецуела извлекоа 11-годишно момче од урнатините повеќе од три дена по серијата разорни земјотреси што ја погодија земјата, информираат светските медиуми.
Информацијата ја потврди привремената претседателка Делси Родригес, која соопшти дека детето било извадено живо во Карабаледа, во сојузната држава Ла Гуаира. Таа на социјалната платформа Икс објави и видеоснимки од спасувањето, нагласувајќи дека секој спасен живот е извор на надеж за земјата.
Локалните итни служби водат интензивна битка со времето за да пронајдат уште преживеани под урнатините, со оглед на тоа што од катастрофалните потреси веќе поминаа неколку дена. Како што пренесуваат медиумите, хуманитарните организации укажуваат дека првите 48 до 72 часа се клучни за преживувањето, но спасувања се можни и по подолг период доколку заробените лица имаат пристап до вода и воздух. Претходно, екипите успеаја да спасат и новороденче, 32 часа по последователните потреси.
Паралелно со спасувачките акции, црната биланс во земјата продолжува да расте. Претседателот на венецуелскиот парламент, Хорхе Родригес, соопшти дека бројот на загинати досега се искачи на 1.430 лица, додека официјално се регистрирани 3.238 повредени.
Состојбата на терен останува критична поради огромниот број лица кои сè уште не се лоцирани во најпогодените региони.
Раководителот на хуманитарните операции на Обединетите нации Том Флечер изјави дека повеќе од 50.000 луѓе се водат за исчезнати и додаде дека не е исклучено овој број значително да порасне, имајќи ја предвид исклучително сложената спасувачка операција што се одвива во најпогодените области.