Пратеникот на СДСМ, Миле Талески, во собраниската расправа за измените на законите за образование порача дека Владата ја претставува „оптимизацијата“ како реформа, а всушност носи неизвесност, страв и сериозни последици за учениците, наставниците и руралните средини.
Талески директно ја обвини министерката за образование Јаневска дека избегнува да ја брани законската измена пред пратениците.
„Дотичната министерка за образование не е присутна и ја нема тука да се соочи со аргументите на народните избраници. Самиот факт што на овој предлог-закон се потпишани само пет пратеници покажува дека самата министерка бега од оваа работа и ја префрла на пратениците во Собранието.“ рече Талески.
Талески потенцираше дека ова не е реформа, туку процес што создава страв кај сите засегнати.
„Она коешто денес го гледаат наставниците, родителите и учениците не е реформа. Тоа е неизвесност. Тоа е страв. Тоа е чувство дека повторно некој зад затворени врати носи одлуки кои ќе имаат далекусежни последици за иднината на образованието.“
Пратеникот Талески предупреди дека наместо транспарентен процес и јавна дебата, Владата нуди импровизација и носи мерки што ќе значат затворање на училишта и отпуштања.
„Она што денес им се нуди на граѓаните е сурова реалност – укинување на паралелки, затворање на училишта, намалување на фондот на часови и огромен ризик голем број наставници да останат без работа.“
Особено, како што истакна, на удар ќе бидат помалите населени места.
„Најголемиот удар ќе го почувствуваат помалите населени места и руралните средини. Наместо да ги зајакнувате овие средини и да создавате услови младите да останат таму, вие практично им порачувате дека нивните деца ќе мора да го напуштат сопственото место на живеење за да можат да посетуваат настава во друго место.“
Талески отвори и сомнеж дека зад најавената оптимизација се кријат нови бизнис интереси преку организираниот превоз на ученици.
„Јавноста со право поставува едно многу сериозно прашање. Дали зад оваа оптимизација се создава простор за нови милионски тендери за превоз на ученици? Кој ќе го организира превозот? Колку ќе чини самиот превоз? Кои компании ќе ги добиваат тие договори и дали наместо да инвестирате во опстанок на училиштата ќе инвестирате во нови бизниси на товар на граѓаните?“
Тој нагласи дека наставниците не смеат да бидат третирани како статистика.
„Наставниците не се бројки на табели. Зад секој наставник стои едно семејство, една професионална кариера и човечко достоинство. Денес илјадници наставници живеат во страв и неизвесност.“
Талески оцени дека Владата нема никакви анализи и одговори на клучните прашања поврзани со последиците од законот.
На крајот, Талески повика Владата да го повлече законот и предупреди дека затворањето на училиште значи уништување на иднината на целите заедници.
„Повлечете го овој предлог-закон. Ова е катастрофа којашто ја правите во образовниот систем… Кога ќе затворите едно училиште, имајте на ум дека не затворате само една зграда, затворате дел од иднината на една заедница, на едно населено место, на едно село, на еден град и на една држава.“