Одлуката за воведување ограничувања за движење во шумите не значи целосна забрана за граѓаните да влегуваат во шумски предели, туку воведување задолжителна евиденција преку издавање дозволи, појасни директорот на Дирекцијата за заштита и спасување, Стојанче Ангелов.
Според него, мерката е превентивна и има цел да се намали ризикот од појава и ширење на шумски пожари во периодот со високи температури.
Првиот човек на ДЗС децидно укажува дека граѓаните и натаму ќе можат да ги посетуваат овие места, но под строго утврдени правила.
„Движењето во шума всушност не се забранува, само се воведува обврска да се извади дозвола која служи за евиденција“, изјави Ангелов.
Оваа рестрикција доаѓа во време кога високите температури и сувото време драстично го зголемуваат ризикот од избувнување на пожари на отворен простор низ земјава.
Поради тоа, надлежните институции апелираат граѓаните да бидат максимално внимателни и да избегнуваат активности кои можат да предизвикаат огнена стихија.
Ограничувањето е донесено од страна на Министерството за земјоделство, шумарство и водостопанство, во согласност со одредбите од Законот за шумите.
Како што е веќе утврдено, одлуката ќе почне да се применува во периодот од 1 јули до 31 август 2026 година.