Републичкиот хидрометеоролошки завод (РХМЗ) издаде низа итни предупредувања поради силен топлотен бран што во наредните денови ќе ја зафати земјата.
Според најновите прогнози, се очекува период на екстремно високи температури кои ќе се движат од 32 степени на почетокот на бранот, до критични 39 степени за време на викендот и почетокот на следната недела.
Особено изразено ќе биде во областа на Белград од 26 јуни до 2 јули, каде покрај топлите денови, се очекуваат и тропски ноќи во кои температурата нема да падне под 20 до 25 степени.
Покрај директното влијание врз здравјето, од РХМЗ нагласуваат дека овие временски услови носат и екстремен ризик од појава и брзо ширење на пожари на отворено, поради сериозниот дефицит на влага во почвата.
Првиот удар ќе се почувствува во петок со утрински температури од 15 до 23 степени и максимални дневни од 32 до 36 степени. Попладне во ридско-планинските подрачја на југозападна и јужна Србија можни се краткотрајни врнежи од дожд или грмежи. За поголемиот дел од земјата веќе е активиран портокалов аларм со индекс на топлотен стрес од 33 до 41 степен, што може да предизвика топлински грчеви и рана исцрпеност.
За време на викендот се очекува дополнително зголемување на опасноста. В сабота времето ќе биде сончево со минимални температури од 16 до 22 и максимални од 34 до 38 степени. Поради ова, црвено предупредување за екстремна опасност се шири во големи делови од северна и централна Србија, што директно ги загрозува животите на луѓето и животните, особено на хронично болните лица.
В недела температурите ќе се искачат во опсегот од 35 до 39 степени, а ветерот ќе го промени правецот кон југоисток. Метеоролозите предупредуваат дека температурите над 38 степени претставуваат закана за инфраструктурата и можат да предизвикаат проблеми со снабдувањето со електрична енергија и тешкотии во сообраќајот.
Исклучително тежок ќе биде и понеделник, со 95 проценти веројатност максималната температура да надмине 38 степени, а дневните вредности ќе се движат од 35 до 39 степени. Слично време со температури до 39 степени на повеќето места ќе се задржи и во вторник, 30 јуни.
Промена на времето и пад на температурите се очекуваат од среда, 1 јули, кога РХМЗ најавува почести локални врнежи од дожд со грмотевици, што ќе продолжи и во втората половина од неделата.