Бројот на жртви од двата последователни силни земјотреси што ја погодија Венецуела се зголеми на најмалку 188, изјави денеска претседателот на Националното собрание на Венецуела, Хорхе Родригез.
Според најновите податоци од веб-страницата каде што се пријавуваат исчезнати лица по земјотресот, речиси 40.000 луѓе се пријавени како исчезнати, пренесува Скај њуз.
Родригез соопшти дека 1.520 повредени лица се веќе хоспитализирани, додека околу 200 луѓе сè уште се заробени под урнатините. Исто така, според неговите информации, 2.927 семејства останаа без своите домови.
„Во трка сме со времето за да спасиме што е можно повеќе од нив живи“, рече Родригез.
Тој додаде дека се стравува дека бројот на загинати и исчезнати може значително да се зголеми во следните часови.
Поради сериозните оштетувања, главниот аеродром во Венецуела е затворен за сообраќај, а жителите од одредени населби веќе се евакуирани во соседен Бразил.
Како последица на двата последователни земјотреси со јачина од 7,5 и 7,2 степени според Рихтеровата скала кои ја погодија земјата синоќа, во Венецуела е прогласена вонредна состојба.
Воздушниот и железничкиот сообраќај се во целосен прекин, а привремено е прекината и наставата во училиштата.