Украина изврши нови напади врз анектираниот полуостров Крим, при што загинаа најмалку две лица, соопштија локалните власти назначени од Москва.
Претседателот на Крим поставен од Москва, Сергеј Аксјонов, изјави дека една од жртвите е малолетно лице. Според него, уште две лица се повредени во нападот што се случил во околината на градот Симферопол.
Жртви се пријавени и во руската погранична Брјанска област. Вршителот на должноста гувернер на регионот, Егор Ковалчук, соопшти дека дрон погодил автомобил во близина на селото Солова, при што загинале 23-годишниот возач и 15-годишен сопатник.
Украинските напади со беспилотни летала предизвикаа пожари и во јужниот руски Краснодарски крај. Регионалниот штаб за цивилна заштита на Телеграм објави дека, поради паднати остатоци од дрон, избувнал пожар во кругот на складиште за нафта во Полтавскаја. Овој објект беше погоден и минатата недела.
Во Абинскиот реон, исто така, избувна пожар во фабрички комплекс, предизвикан од остатоци од соборен дрон.
Украинскиот претседател Володимир Зеленски на социјалните мрежи го потврди нападот врз складиштето за нафта. Тој наведе дека биле погодени и две рафинерии во Уфа, во руската Република Башкортостан.
Шефот на републиката, Радиј Хабиров, на Телеграм соопшти дека нападот со дронови врз градот Уфа бил одбиен. Според него, остатоците паднале во индустриска зона, нема повредени, а претпријатијата продолжуваат да работат нормално. Башкортостан се наоѓа источно од Москва, во јужниот дел на планината Урал.
Руското Министерство за одбрана соопшти дека во текот на ноќта биле пресретнати 269 украински дронови над руска територија и над анектираниот Крим.
Во настојувањата да ја одбие руската инвазија, која веќе е во петтата година, Украина ги засили контранападите, насочувајќи ги првенствено кон руската нафтена и гасна индустрија, како и кон воените објекти. Киев се обидува да ги наруши испораките на гориво за руската армија и да ги намали приходите од енергетскиот сектор.
Недостиг на гориво е пријавен во сè поголем број руски региони, а Крим е меѓу најпогодените области.