Државниот завод за ревизија утврди сериозни системски слабости во работењето на АД МЕПСО за 2024 година. Проблемите со сопственоста на далноводите, инвестициите без документација, како и нерегуларните вработувања директно влијаат врз ефикасноста на електропреносниот систем во државата.
Иако компанијата истата година остварила раст на приходите од својата основна дејност, во извештајот стои дека се откриени сериозни слабости во работењето.
— Утврдени се слабости во евиденцијата и регулирањето на сопственоста на електропреносната инфраструктура, вклучително и земјиштето. Дел од имот нема уреден правен статус, а има и имот за кој нема точна сметководствена евиденција — стои во извештајот.
Ревизорите наведуваат дека од вкупно 112 далноводи на МЕПСО, за дури 59 од нив друштвото не располага со имотни листови. Дополнително, сè уште не се решени сопственичките односи за 33 трафостаници кои се во заедничка сопственост на МЕПСО и „ЕВН Македонија“. Постојната сметководствена евиденција не овозможува да се потврди точниот број и вредност на овие објекти.
— Далноводите и трафостаниците се евидентирани по делови, на различни сметки за градежни објекти, постројки и опрема и со неусогласени називи, поради што не е можно да се потврди нивниот број и вредност — се наведува во извештајот.
Ревизијата открива и дека завршени проекти со вредност над 1,2 милиони евра не се ставени во употреба. Дополнително, кај проектот за далноводот ТС Валандово – ТС Милетково, МЕПСО веќе платил над 155.000 евра за провизии за одобрен заем од ЕБОР, иако изградбата сè уште не е започната. Од вкупно одобрените 102,4 милиони евра меѓународни кредити, дури 53,4 милиони евра останале неповлечени.
— Ненавременото користење на заемите го зголемува финансискиот товар и ја забавува реализацијата на стратешките проекти за електропреносниот систем — констатира Државниот завод за ревизија.
Сериозни забелешки има и за кадровската политика. Кај 45 нововработени лица, односно кај 65 проценти од вкупниот број нови вработувања, ревизорите утврдиле неправилности во исполнувањето на условите од јавните огласи и систематизацијата. Дел од вработените биле прераспределени или унапредени кратко време по нивното вработување.
Воедно, се потенцира и потребата од санација на фасадата на управната зграда, која била оштетена во 2020 и 2021 година, иако за нејзина реконструкција и адаптација во периодот од 2013 до 2018 година биле потрошени околу 8,9 милиони евра.