Град Скопје претстојниов викенд ќе ја реализира редовната авионска дезинсекција на подрачјето на главниот град со цел уништување на возрасните форми на комарци.
Акцијата на терен ќе се одвива во текот на двата дена од викендот, односно во раните утрински часови кога фреквенцијата на движење е најмала.
„Градот Скопје ги известува граѓаните дека претстојниов викенд, односно на 27.06.2026 година (сабота) и на 28.06.2026 година (недела), во раните утрински часови ќе изврши авионска дезинсекција против возрасни форми на комарци на подрачјето на градот Скопје“, се наведува во официјалното соопштение.
Како и при секоја слична акција, спроведувањето на дезинсекцијата во голема мера ќе зависи од моменталните метеоролошки прилики во скопската котлина.
„Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин“, појаснуваат од градската администрација.
Поради специфичноста на средствата кои се користат при авионското третирање, упатено е и посебно известување до одредени категории граѓани.
„Се известуваат пчеларите навреме да ги преземат потребните мерки за заштита на пчелите“, се потенцира во соопштението за јавност.