Смртоносен топлински бран ја зафати Европа, а научниците предупредуваат дека во текот на оваа недела досегашните температурни рекорди не само што ќе бидат достигнати, туку и сериозно надминати. Ова е веќе втор екстремен топлински бран што руши рекорди во последните два месеца, со реална опасност националните максимуми на старите мерења да паднат уште пред почетокот на јули, кој традиционално важи за најтопол месец во годината. Ситуацијата е веќе критична во Франција, каде што дури 40 луѓе се удавија во изминатите неколку дена во очајни обиди да најдат спас и разладување од неподносливите горештини, што надлежните го опишаа како страшна пошаст.
Во Шпанија живата во термометарот веќе ја надмина границата од 45 Целзиусови степени во провинцијата Андалузија, а речиси целата територија на земјата е ставена под итен метеоролошки аларм. Официјални предупредувања за екстремни температури во моментов се на сила во дури 23 европски земји, при што пет од нив се наоѓаат во највисокото, црвено ниво на опасност, а тоа се Германија, Франција, Шпанија, Швајцарија и Луксембург. Состојбата се влошува и на Балканот, каде што хрватскиот Државен хидрометеоролошки завод го подигна нивото на тревога поради бранот кој ќе се задржи до крајот на неделава и ќе продолжи во првата половина од следната, со посебен фокус на јадранскиот брег каде што во Сплит, Риека и Дубровник е прогласена многу голема опасност по здравјето на граѓаните.