Грчката полиција уапси три лица, а уште 105 се осомничени како дел од криминална организација која преку манипулации на броила вршела масовна кражба на електрична енергија во повеќе региони низ Грција.
Според првичните проценки на истражните органи, со овие нелегални активности е предизвикана материјална штета која надминува девет милиони евра.
Полициската акција започнала во текот на денешниот ден во реонот на Солун, а се спроведува во координација со надлежните енергетски служби во земјата.
Од грчката полиција информираа дека од рано утрово во тек е акција во Солун во соработка со Операторот на дистрибутивната мрежа за електрична енергија (ДЕДДИЕ) за разбивање на криминалната организација „чии членови вршеле специјализирани манипулации на електрични броила на ДЕДДИЕ (во деловни објекти и домови) во регионите Атика, Македонија, Тракија, Тесалија и Пелопонез, со цел кражба на електрична енергија“.
Кражбите биле добро организирани и таргетирале деловни објекти и приватни куќи во речиси сите клучни региони низ Грција.
Досега се уапсени тројца клучни членови на организацијата, додека вкупно 105 лица се осомничени како вршители на кражби на струја. Штетата нанесена на ДЕДДИЕ надминува девет милиони евра, информираа од полицијата.
Истрагата за случајот продолжува со цел да се утврди дали во мрежата биле вклучени и други правни или физички лица.