Христијан Мицкоски денес се фали со некаков измислен резултат од 3:1 во однос на претходната власт, повикувајќи се на исплатени субвенции и инфлацијата. Тешко е да се најде пример за поголема политичка несеризност и обид да се одбрани неодбранливото. Неговиот вистински резултат не е 3. Неговиот резултат е 0. Со букви: НУЛА!, обвинуваат денеска од СДСМ.
Нула во реформите.
Нула во подобрувањето на животниот стандард.
Нула во зголемувањето на минималната плата.
Нула во мерките за младите.
Нула во поддршка за земјоделците.
Нула во европскиот пат.
За две години власт на Мицкоски и ВМРО:
-Инвестициите паднаа за 60%,
-Откупот на земјоделските производи се намали за 46%
-Буџетот е празен
-Државата се задолжи за 2,5 милијарди евра,
-Потрошувачката кошничка порасна на речиси 70.000 денари.
-Македонските работници имаат најниски плати во Европа.
-Нема програми за младите.
-Младите масовно ја напуштаат државата.
-Субвенциите се намалени за 40 милиони евра, земјоделците останаа без пари,и ИПАРД програмата беше блокирана затоа што директорот беше уапсен поради кражба.
Мицкоски јавно вети дека до 1 јуни ќе ја исполни целата реформска агенда и ќе отвори кластери со Европската унија. Ништо од тоа не е направено.
Копенхашките критериуми не се испочитувани, а законот за правосудство, кој ЕУ го врати како недоволно реформиран, и понатаму е проблем. Наместо реформи, имаме политички прогони кои се нарачуваат од собраниска говорница и по телефон.
Кога некој се обидува врз основа на две тесни ставки да гради наратив за успех, додека го игнорира економскиот крах, масовното иселување на младите, празниот буџет и целосниот застој на европскиот пат, тогаш станува збор за пропаганда, а не за резултати.
Граѓаните не живеат од статистика за цената на тутунот. Тие живеат од плати, пензии, цени во продавниците и перспектива за своите деца. А таму билансот на оваа власт е длабоко негативен.
Целиот резултат на оваа влада граѓаните го гледаат во новчаникот и во фрижидерот.
Македонија забрзува во пропаст!, стои во реакцијата на партијата.