Министерката за енергетика, рударство и минерални суровини, Сања Божиновска, денеска учествуваше на настанот „IFC Day in North Macedonia“, во организација на Меѓународната финансиска корпорација (IFC). Собирот, кој за првпат се одржува во земјава во партнерство со државните институции, е посветен на перспективите за енергетска транзиција и развојот на извозното производство.
Божиновска беше дел од панел-дискусијата фокусирана на енергетските реформи, заедно со претставници на Светска банка, МЕПСО и приватниот сектор. За време на излагањето, таа стави посебен акцент на новата законска регулатива донесена во текот на изминатата 2025 година.
„Создаваме правна рамка за поотпорен и посигурен енергетски систем. Новиот Закон за енергетика, донесен во 2025 година, ја усогласува Македонија со Пакетот за чиста енергија на Европската Унија и воспоставува посилна рамка за развој на обновливите извори на енергија, системите за складирање на енергија, пазарите за тргување ден однапред, поголемо учество на потрошувачите, планирањето во вонредни услови и десетгодишното планирање на мрежата. Особено важно е што законот воведува појасни правила за приклучување на електроенергетската мрежа и го третира складирањето на енергија као посебна регулирана дејност, што е од суштинско значење доколку сакаме обновливите извори на енергија да ја зајакнат, а не да ја нарушат сигурноста на снабдувањето.“ истакна Божиновска.
Министерката посочи дека во завршна фаза е и усвојувањето на Пакетот за интеграција на енергетските пазари кој е усогласен со Европската Унија, по што ќе следи верификација од Секретаријатот на Енергетската заедница и Европската комисија.
Во однос на регионалното поврзување, Божиновска ги претстави активностите на домашниот оператор МЕМО.
Нашата цел е македонскиот пазар поефикасно да се интегрира со регионалните и европските пазари на електрична енергија, бидејќи подлабоката пазарна интеграција значи поголема ликвидност, подобри можности за управување со ризиците и поголема доверба кај инвеститорите, истакна Божиновска
Ресорното министерство, преку тесна соработка со домашните и меѓународните фактори, останува фокусирано на спроведувањето на реформите кои треба да обезбедат долгорочна енергетска стабилност за државата.