Министерството за економија и труд го поздрави почетокот на новата инвестиција на компанијата „CAVO Otomotiv“ во Технолошко-индустриската развојна зона во Тетово. Вредноста на овој нов капацитет, според официјалните најави, ќе достигне 21 милион евра, а со неговата реализација се очекува отворање на околу 550 нови работни места во автомобилската индустрија.
Оваа инвестиција ќе се реализира во ТИРЗ Тетово, која е единствената зона во државата што функционира по моделот на јавно-приватно партнерство и се наоѓа под директна надлежност на Министерството за економија и труд. Од ресорното министерство посочуваат дека овој модел уште еднаш ја потврдува ефикасноста на соработката меѓу државата и приватниот сектор за привлекување крупни капитални проекти.
Станува збор за реномирана мултинационална компанија која поседува производствени капацитети во повеќе земји. Раководството на компанијата донесе одлука дел од своето производство, кое во моментов се реализира во Турција и Словачка, комплетно да го пренесе во Северна Македонија.
По повод официјалното објавување на инвестицијата, министерот за економија и труд, Бесар Дурмиши, потенцираше дека напорите за подобрување на деловната клима веќе даваат конкретни резултати на терен.
„Оваа инвестиција е уште една потврда дека Северна Македонија станува сѐ попривлечна дестинација за компании кои носат современи технологии, нови производствени капацитети и квалитетни работни места. Одлуката на CAVO Otomotiv да инвестира токму во Тетово е јасен сигнал дека напорите за подобрување на деловната клима и создавање стабилна и предвидлива инвестициска средина даваат конкретни резултати.
Како Министерство за економија и труд, остануваме посветени на поддршка на инвестиции кои создаваат додадена вредност, генерираат извоз и отвораат добро платени работни места. Новите 550 работни места ќе значат нови можности за вработување, професионален развој и стекнување современи знаења и вештини. Нашата цел е јасна – повеќе инвестиции, посилна економија и подобар животен стандард за граѓаните“, изјави министерот Бесар Дурмиши.
Според официјалните податоци, ТИРЗ Тетово бележи континуиран напредок. Во текот на 2025 година, компаниите лоцирани во оваа зона реализирале вкупно производство во вредност од над 6,4 милијарди денари, додека извозот на производи и услуги достигнал речиси 9 милијарди денари. Во зоната во моментов веќе работат 1.845 лица.
Министерот Дурмиши упати јавна благодарност до сите домашни институции кои беа вклучени во овој сложен процес, како и до раководството на компанијата „CAVO Otomotiv“ за довербата да ја избере државата како своја нова инвестициска дестинација.