Вкупно 230 милиони евра се префрлени досега за поддршка на домашните компании во рамки на кредитната линија од унгарскиот кредит, соопшти денеска премиерот Христијан Мицкоски. Одговарајќи на новинарски прашања, тој појасни дека само во текот на минатата недела за оваа намена биле исплатени околу 120 милиони денари.
Владата очекува дека преку овие поволни услови, вкупните инвестиции на домашните претпријатија двојно ќе се зголемат.
„Знаете дека каматната стапка на кредитот е од 1,95%, нешто кое што претставува субвенционирано од страна на Владата, со грејс период од 3 години, до 12 години рок на отплата. И на тој начин практично, ние очекуваме барем двојно повеќе таа сума да се зголеми, кога станува збор за инвестиции на домашните компании“, изјави Мицкоски.
Според него, ваквиот економски прилив е директно поврзан со позитивните резултати во индустрискиот сектор за месец април, кој покажува стабилизација по претходните глобални потреси.
„Тоа е практично една од причините, да се надоврзам веднаш на второто прашање, зошто имаме раст во индустријата во месец април. Се консолидиравме после оној шок во март, кога се случи војната во заливот и кога практично ескалираше најголемата енергетска криза којашто ја памети човештвото во овој милениум. А според сите познавачи, ова е поголема од последните 3 енергетски кризи заедно“, потенцираше премиерот.
Мицкоски додаде дека во април консолидираната индустрија забележала раст од 7,4 или 7,5 отсто во размената во споредба со истиот месец минатата година, нагласувајќи дека државата успешно се движи напред и покрај обидите за создавање паника во јавноста.