Најмногу дожд во изминатото деноноќие наврна во Тетово и на Попова Шапка, каде се измерени 16 литри на метар квадратен. Во Крушево наврнале 13 литри, во Берово 12, во Куманово 11, а во Штип 10 литри на метар квадратен, соопшти УХМР.
Според прогнозата, денеска времето ќе биде променливо облачно и посвежо, со повремени врнежи од дожд, кои локално ќе бидат проследени со грмежи. На одделни места се очекува нестабилност со пороен дожд, грмежи, засилен ветер и услови за ретка појава на град.
Ќе дува засилен северен ветер, а долж Повардарието повремено и силен, со брзина над 60 километри на час. Максималната температура ќе се движи од 20 до 27 степени Целзиусови.
Во Скопје времето ќе биде променливо облачно и посвежо, со можност за слаби врнежи од дожд во претпладневните часови. Ќе дува засилен северен ветер, кој во делови од котлината повремено ќе достигнува и поголема јачина. Максималната температура ќе изнесува до 24 степени Целзиусови.