Парламентарни избори во земјава ќе има „многу скоро“, најави денеска премиерот Христијан Мицкоски, без притоа да прецизира конкретен датум или термин за нивно одржување. Тој порача дека иако владината коалиција преферира редовен термин, тие се целосно подготвени да излезат на терен во секој момент доколку тоа го побара опозицијата.
Премиерот одговараше на новинарски прашања при денешното пуштање во употреба на спортската сала „Расадник“ во скопската општина Кисела Вода.
Прашан за тоа дали се планираат предвремени избори во 2027 година или пак ќе се чека редовниот термин во 2028 година, тој ја образложи партиската и владината позиција.
„Политички умно е кога ќе влезете во втората половина од мандатот да бидете подготвени за било какви сценарија. Ние сме кажале дека нашата опција која ја преферираме како Влада се редовни избори во 2028 година, но сме подготвени ако опозицијата побара да излеземе на терен и да победиме“, изјави Мицкоски.
Покрај изборниот циклус, Мицкоски најави и почеток на внатрешни процеси во владината коалиција кои се однесуваат на идна кадровска реорганизација.
Премиерот соопшти дека разговорите со коалиционите партнери околу евентуалната реконструкција на Владата ќе започнат веќе од следната недела.
„Најпрво сакам да ја слушнам визијата, да видиме дали таа се поклопува, па дури потоа можеме да звориме за кадровски решенија“, додаде Мицкоски.