Оперативниот план за вработување за 2026 година предвидува вкупен опфат на над 10.000 лица и има за цел отворање нови работни места и намалување на стапката на невработеност во земјава. Ова денеска на прес-конференција го соопшти пратеничката и член на ИК на ВМРО-ДПМНЕ, Ели Панова, потенцирајќи дека планот претставува значаен чекор за зајакнување на домашната економија.
Панова истакна дека буџетот на овој оперативен план изнесува скоро 40 милиони евра, при што најголемиот дел од финансиите оди директно за поддршка при вработувањето.
„Главен приоритет е отворањето нови работни места, при што предвидени се повеќе од 32 милиони евра коишто се директно наменети за таа цел. Младите повторно се во фокусот, а според Оперативниот план за оваа година, најголем дел од средствата се насочени кон лицата до 29 години. Севкупно, Оперативниот план за 2026 година предвидува вклучување на речиси 6.000 млади лица до 29 години“, изјави Панова.
Според нејзините зборови, за младите до 23 години кои ќе се вработат во производниот сектор се предвидува посебна финансиска стимулација, како и дополнителни обуки и практикантство со цел полесно прилагодување на пазарот на труд.
Таа ги образложи и конкретните очекувања од клучните програми кои се дел од овој годишен план.
„Преку мерката Самовработување-претприемништво се очекува отворање на над 2.000 нови работни места, додека со мерката Поддршка за креирање нови работни места ќе се поддржи вработувањето на над 1.500 лица. Со овие две мерки се предвидува поддршка за повеќе од 3.500 лица“, нагласи пратеничката на ВМРО-ДПМНЕ.
Панова направи и компарација со претходната година, посочувајќи дека таргетираните мерки за младите веќе дале резултати во отворањето на нови правни субјекти, додавајќи дека актуелната Влада продолжува да работи на подобрување на животниот стандард и условите за бизнис.