Претседателката Гордана Сиљановска-Давкова во среда во Софија ќе се сретне со бугарската колешка Илијана Јотова, во рамките на самитот на Процесот за соработка на Југоисточна Европа. На средбата се очекува да бидат отворени и суштински прашања во односите меѓу двете земји.
Во интервју за „360 степени“ на МРТ 1, Сиљановска-Давкова истакна дека средбата претставува продолжение на претходните контакти и можност за зајакнување на меѓусебната доверба.
Таа нагласи дека градењето доверба меѓу двете земји е клучно и дека е потребно унапредување на комуникацијата и соработката на повеќе нивоа.
– Тоа е природно продолжение на нашата средба во Ереван на едно пријатно женско говорење. Мислам дека треба да го продолжиме тоа и затоа во текот на разговорот со вас ја споменав неопходноста од мерки за градење доверба. Ако граѓаните не контактираат, ако заеднички не учествуваме во проекти… морам да кажам, кога првпат го сретнав господинат Радев во Софија и се случи оној инцидент со знамињата, се заборави, сите што бевме присутни на работниот ручек, каде што тој говореше за потребата од соработка во многу области во кои заедно би постигнале подобро, полесно, многу, многу успеси. И јас мислам дека тоа е единствениот начин за да можеме ние bona fide да се однесуваме. Да не се навредуваме, да не повредуваме, да се обидеме да ги мериме зборовите – рече таа.
Во однос на прашањето за средбите на премиерот Христијан Мицкоски со германскиот канцелар Фридрих Мерц и францускиот претседател Емануел Макрон во Тиват, претседателката изјави дека очекува дополнителни информации по утрешната средба со премиерот.