Пратеникот од редовите на ВМРО-ДПМНЕ, Бране Петрушевски, на денешната прес-конференција јавно го повика Јавното обвинителство да отвори истрага за нова, голема корупциска афера во Царината.
Петрушевски истакна дека првичните информации за митото од 2.000 евра се само почеток на криминална мрежа тешка 18 милиони денари, која била договарана преку мобилни апликации.
„Митото од 2.000 евра кое Богац го земал од Џемо е само почетокот на аферата во Царина вредна 18 милиони денари. Според информациите добиени од свиркачи, Богац преку вибер со Џемо го договарал тендерот вреден 18 милиони денари, а 2.000 евра биле првата од повеќето исплати кои требало да ги добие токму Богац како награда од Џемо.“
Од владејачката партија бараат од надлежните органи да проверат дали крајната сума која требало да му биде исплатена на осомничениот изнесува 10 проценти од вкупната вредност на тендерот.
„ЈО мора да истражи дали е точна информацијата до која дојдовме дека Богац требал да добие 10 проценти од местениот тендер, односно 1,8 милиони денари?“
На крајот, Петрушевски упати остри критики до опозицијата за нивниот молк и недостиг на реакција за криминалните афери на нивните сопартијци.
„И СДС и Филипче молчат и не се оградуваат од криминалните афери на своите членови. Еден ден е Богац, еден ден е поранешен градоначалник на општина, друг ден е член на ИО на СДС, трет ден цели фамилии, браќа, братучеди, кланови. Од Филипче и СДС никаква осуда. Колку пари требал да земе Богац за Филипче да го смета ова за криминал? Дали можеби 20% како што Филипче зема за модуларната? Ова е СДС матрица на дело. Граѓаните мора да го увидат нивниот начин на владеење за никогаш повторно да не ни се случи.“