Регистрирани се повеќе случаи на семејно насилство, меѓу кои физички напади и пријави за демнење во Виница, Тетово, Гевгелија и Скопје. Во рамки на случаите, против едно лице е поднесена кривична пријава, а две лица се лишени од слобода.
Како што информираат од Министерството за внатрешни работи, ОВР Виница поднела кривична пријава против Н.П. (37) поради постоење основи на сомнение за сторено кривично дело „телесна повреда“. Тој се сомничи дека на 22 мај во семејниот дом во виничко село физички ја нападнал својата 22-годишна сопруга и ѝ нанел повреди, констатирани во Здравствениот дом во Виница.
Во Тетово, по пријава од поранешни партнерки, две лица биле лишени од слобода. Полициски службеници од СВР Тетово го лишиле од слобода Ј.С. (58), по пријава од неговата поранешна невенчана сопруга, која навела дека била следена, вознемирувана и дека ѝ биле упатувани закани со цел обновување на заедничкиот живот. Лицето е задржано во полициска станица, по што ќе следува соодветна пријава.
Исто така, во Јегуновце бил лишен од слобода С.К. (30) од Скопје, по пријава од 30-годишна тетовчанка, која навела дека во текот на денот неколку пати ја следел и барал повторно да бидат заедно.
Случаи на физичко насилство меѓу сопружници се регистрирани и во Гевгелија и Скопје. Во Гевгелија, 23-годишна жена пријавила дека била физички нападната од својот сопруг Т.М., по што тој бил повикан во полициска станица, а за случајот е известен јавен обвинител од Основното јавно обвинителство Гевгелија.
Во Скопје, 61-годишен маж пријавил дека бил физички нападнат од неговата вонбрачна партнерка во дом на подрачјето на општина Аеродром. Се преземаат мерки за целосно расчистување на случајот, соопшти МВР.