На Меѓународниот економски форум во Санкт Петербург беа презентирани три можни сценарија за иднината на Русија, каде што употребата на нуклеарно оружје и окупацијата на барем југоисточниот дел на Украина се прогласени за „добро“ сценарио.
Извештајот за иднината на државата го претставија бизнисменот Константин Малофеев и ултрадесничарскиот јавен активист Александар Дугин, кој важи за главен идеолог на концептот „руски свет“.
Првото сценарио во извештајот е означено како „лошо“ и според него Русија ја губи војната против Украина, што би довело до „колонизација на Русија“ до 2050 година.
Второто сценарио е именувано како „инерцијално“, каде „сè оди како што оди“, а крајниот исход од таквата состојба предвидува „не чека американска и кинеска хегемонија“.
Третото сценарио, кое авторите го дефинираат како „добро“, предвидува „јасна слика за победата во идеолошката војна“, преку употреба на нуклеарно оружје, руска окупација на Крим, Одеса, Харков „и така натаму“, како и распаѓање на Европската унија.
За спротивставување на заканите кон Русија, Малофеев предлага сет мерки каде на прво место е „идеологија/дезападнација“, на второ „национализацијата на елитите“, а на трето „автократијата“.
Коавторот Дугин истакна дека администрацијата на претседателот на Руската Федерација „постојано ја разгледува“ потребата на Русија за идеологија, додавајќи дека во земјата веќе постои автократија, но нејзината „легализација се одвива бавно“.
Паралелно со ова, според проценката на ISW, Владимир Путин не е подготвен да ги намали трошоците за војната против Украина, и покрај предупредувањата на руските власти за растечкиот товар на економијата на Руската Федерација.
Аналитичарите сметаат дека Кремљ може да продолжи со таквата политика поради надуените оценки за сопствените успеси на фронтот и вербата на Путин во можноста за постигнување воени цели, иако тоа ќе ги продлабочи економските проблеми на земјата.