Најмалку 21 лице го загуби животот, а неколкумина се повредени во голем пожар што зафати висока зграда во главниот град на Индија, Њу Делхи, соопштија од локалната полиција.
Според првичните информации објавени од индиските медиуми, меѓу загинатите има и странски државјани од јужноазиските земји, кои престојувале во објектот поради медицински третман или како придружба на своите блиски.
Објектот во кој избувнал пожарот функционирал како пансион за пациенти и нивни семејства, лоциран во непосредна близина на приватна болница.
Во моментот на несреќата сè уште не бил познат точниот број на луѓе кои се наоѓале внатре. Спасувачките служби информираат дека повеќе од 40 лица биле извлечени живи од пламените јазици и итно пренесени во болница.
Причините за избувнувањето на пожарот засега остануваат непознати и се предмет на истрага.
Пожарникарите успеале да го стават огнот под контрола, но пребарувањето на објектот продолжило и по гаснењето со цел да се утврди дали има уште затрупани лица под урнатините.
Сочувство за жртвите изрази и индискиот премиер Нарендра Моди, кој веднаш најави парична помош за настраданите во оваа несреќа.
„Индискиот премиер Нарендра Моди изрази сочувство за жртвите и најави финансиска помош за семејствата на загинатите и повредените, при што е предвидено обештетување од 200.000 рупии за семејствата на загинатите и 50.000 рупии за повредените.“