Во Собранието денеска седници ќе одржат Комисијата за економски прашања, труд и енергетска политика, Комисијата за финансирање и буџет и Комисијата за надворешна политика и надворешна трговија.
Комисијата за економски прашања, труд и енергетска политика ќе го разгледува Предлог-законот за изменување на Законот за упатување работници од Република Северна Македонија во други држави за изведување градежни работи преку проектни договори и за вршење други сезонски работи, во прво читање.
Пред членовите на Комисијата за финансирање и буџет ќе се најдат Предлог-законот за игрите на среќа и забавните игри, како и Предлог-законот за изменување и дополнување на Законот за данокот на додадена вредност, исто така во прво читање.
На седницата на Комисијата за надворешна политика и надворешна трговија, Орхан Муртезани ќе ја претстави платформата за дипломатските активности како вонреден и ополномоштен амбасадор и шеф на Постојаната делегација на Република Северна Македонија при НАТО.
Пред членовите на Комисијата својата платформа за дипломатските активности ќе ја презентира и Светлана Гелева, кандидат за вонреден и ополномоштен амбасадор и постојан претставник на Република Северна Македонија при Советот на Европа во Стразбур.