Пратеничката на СДСМ, Јована Тренчевска, побара од министерот за животна средина и просторно планирање, Муамед Хоџа, одговор како неговото министерство дало согласност за Нацрт-просторниот план во кој се предвидува отворање на уште пет рудници на метали.
Тренчевска посочи дека во изминатиот период се сведоци на најавите на премиерот Христијан Мицкоски за изградба на рудници за метали и антимон како развојна шанса, но порача дека Македонија не е приватна фирма и дека природните богатства им припаѓаат на граѓаните.
Нагласувајќи ги деталите од документот, таа истакна:
„Еве да појаснам – на страница 187 од Нацрт-планот јасно е наведено дека треба да се отворат уште пет рудници на метали. И тоа не се некакви имагинарни локации. Во планот се веќе исцртани Иловица–Штука, Казан Дол, Плавица, Кадиица и Луке.“
Според неа, во истиот план се предвидува површините под експлоатација на критични минерални суровини да се зголемат од околу два на приближно десет квадратни километри, што претставува петкратно зголемување.
Тренчевска побара транспарентност за тоа каде точно ќе бидат коповите, јаловиштата и постројките и колку ќе бидат оддалечени од домовите и изворите на вода.
„Оттука моето прашање до вас министре е : Како е можно вашето министерство да даде согласност за ваква работа, кога ништо не се знае како овие рудници ќе влијаат врз животната средина и здравјето на граѓаните? Што водите Вие – бизнис или министерство кое треба да гарантира чиста животна средина?“, праша Тренчевска.