Мајчиното ментално здравје како приоритет: од препознавање кон достапна поддршка за секоја мајка“ е темата на конференцијата што ќе се одржи денеска, на која ќе бидат презентирани наодите од анализата „Кој се грижи? Мајчинство, ментално здравје и невидливиот товар на очекувањата“.
Како што е најавено, конференцијата ќе ја отвори министерот за здравство Азир Алиу, а на настанот ќе присуствуваат и францускиот амбасадор Кристоф Ле Риголер, претставници на Здружението за еманципација, солидарност и еднаквост на жените (ЕСЕ), како и претставници на „Реактор – Истражување во акција“.
Целта на конференцијата е да се стави мајчиното ментално здравје во фокусот на јавната дебата и институционалните политики, преку препознавање на потребите на мајките и унапредување на пристапот до поддршка во заедницата и здравствениот систем. Ќе бидат споделени искуства, наоди и препораки поврзани со периодот на бременост, породување и рано мајчинство.
Во рамки на програмата е предвидена и презентација на искуства од работа со жени Ромки во областа на менталното здравје и застапување во Севилја, Шпанија, од Даниела Миранда Рохас од Универзитетот во Севилја – ЦЕСПИД, како и панел-дискусија на тема „Поддршка за перинаталното ментално здравје во заедницата: потреби, можности и следни чекори“.