По повод Светскиот ден без тутун, Министерството за здравство, во соработка со Институтот за јавно здравје и Светската здравствена организација, се приклучи на глобалната кампања под мотото „Разоткривање на привлечноста – спротивставување на зависноста од никотин и тутун“. На прес-конференција беа најавени конкретни чекори за помош на граѓаните на локално ниво.
Министерот за здравство, Азир Алиу, истакна дека веќе се спроведуваат координирани активности за зајакнување на услугите за откажување од пушење во здравствените домови и локалната самоуправа.
Како клучна новина во здравствениот систем, министерот го посочи проширувањето на есенцијалната листа на лекови. За првпат на оваа листа се вклучени препарати кои помагаат при одвикнување од пушење, како што се трансдермалните фластери и никотинските гуми за џвакање, со цел тие да бидат полесно препишувани од матичните лекари.
„Со ова сакаме да ја зголемиме нивната достапност, да бидат подобро препознаени и од јавноста и од фармацевтскиот сектор, како и да се поттикне нивната поширока употреба“, рече Алиу.
Покрај достапноста на овие препарати, во подготовка е и нова законска регулатива која треба да воведе построги контроли и усогласување со европските правила за тутунските производи.
Министерството работи на нов закон за заштита од употреба на тутун и сродни производи кој треба системски да ја зајакне заштитата на јавното здравје, со посебен акцент на младата популација преку зајакнување на советувалиштата.