Министерот за култура и туризам Зоран Љутков и градоначалникот на Скопје Орце Ѓорѓиевски денеска потпишаа Меморандум за соработка за унапредување на културата, туризмот и културно-туристичката понуда во главниот град.
Ѓорѓиевски објави на Фејсбук дека документот претставува важен чекор кон позиционирање на Скопје како отворен, гостопримлив и културно жив европски град. Со него се предвидува поголема промоција на културно-историските локалитети, подобрување на условите за посетителите и развој на нови културни содржини.
Тој нагласи дека унапредувањето на културата и туризмот е приоритет, посочувајќи дека проектот „Скопје 2028 – Европска престолнина на културата“ претставува процес на трансформација на градот, со цел зачувување на традицијата, афирмација на културното наследство и создавање нови содржини за домашни и странски посетители.