Најмалку едно лице загина, додека две преживеаја по најновиот американски напад врз брод во источниот дел на Тихиот Океан, за кој Вашингтон тврди дека бил користен за трговија со наркотици, соопшти Јужната команда на Вооружените сили на САД (SOUTHCOM).
Како што пренесува „CBS News“, од Јужната команда наведоа дека бродот бил под управување на организација означена како терористичка, дека се движел по познати криумчарски рути и директно учествувал во операции за трговија со дрога.
Заедно со официјалното соопштение беше објавено и видео-снимка на која се гледа моментот на нападот врз пловилото, кое по силниот удар се распаѓа на два дела од кои избива густ чад.
Американската војска досега нема објавено конкретни докази дека погодените пловила навистина превезувале наркотици. Портпаролот на Јужната команда претходно изјави дека од причини на оперативна безбедност, армијата не може да говори за конкретните извори на информации ниту за методите кои се користат на терен.
Администрацијата на американскиот претседател Доналд Трамп на почетокот на септември започна голема кампања на напади врз бродови во водите на Латинска Америка, вклучувајќи ги Источниот Пацифик и Карипското Море, за кои се сомнева дека шверцуваат дрога.
Според моментално достапните податоци, во оваа воена кампања досега загинале најмалку 193 лица. Трамп претходно изјави дека САД се наоѓаат во „оружен судир“ со нарко-картелите и оцени дека ваквите напади се неопходни за да се запре дотокот на дрога во Сјединетите Американски Држави.