Грчката полиција утрово спроведе масовна акција на островот Крит, при што се уапсени 20 лица под сомнение дека се членови на организирана криминална група за измами со земјоделски фондови.
Надлежните органи во Атина соопштија дека мрежата работела по однапред разработена шема за поднесување лажни изјави, со што директно ги оштетила фондовите на Европската Унија.
„– Нелегалната финансиска корист надминува 3.000.000 евра, информираа од грчката полиција и посочија дека со детални информации ќе излезат по завршувањето на акцијата.“
Меѓу приведените во четири различни области на островот се наоѓаат и службени лица, односно двајца сметководители и тројца одговорни во Центрите за поднесување пријави.
Локалните медиуми, повикувајќи се на полициски извори, пренесуваат дека во целата мрежа која била активна од 2019 година се инволвирани околу 90 лица, кои преку фиктивни договори за закуп на земјиште незаконски повлекувале пари од организацијата ОПЕКЕПЕ.