Министерот за надворешни работи и надворешна трговија, Тимчо Муцунски, попладнево преку социјалните мрежи упати честитка до граѓаните по повод државниот празник 24 Мај – Денот на сесловенските просветители.
Муцунски во своето празнично обраќање го потенцираше историското значење на епохалното дело на солунските браќа како трајно цивилизациско наследство.
„Со својата просветителска и мисионерска дејност, светите браќа ја отворија можноста, словенските народи да читаат, учат и творат на свој мајчин јазик. Нивното дело претставува трајно цивилизациско наследство и темел на културниот и духовниот развој на словенските народи, вклучително и на македонскиот народ – напиша министерот на неговата Фејсбук-страница.“
Шефот на дипломатијата подвлече дека овој датум носи посебна тежина во процесот на зачувување и негување на сопствените корени.
Тој додаде дека 24 мај претставува ден на длабока почит кон јазикот, образованието и културата, лоцирајќи ги овие три столба како клучни вредности што го обликуваат идентитетот и ја градат иднината.