Советничката од редовите на СДСМ во општина Штип, Галаба Вереса Димова, преку прес-конференција обвини за сериозни нерегуларности и финансиски трошења во детската градинка „Астибо“.
Од опозициската партија соопштија дека смената на актуелниот директор на градинката отвора сомнеж за начинот на кој се менаџираат јавните институции во градот.
„Криминалните пипци на ВМРО ОКГ не ги поштедиле ниту детските градинки во Штип. Нетрпението и недовербата помеѓу вмровските функционери очигледно продолжува и кулуминира со смената на директорот на детската градинка Астибо.“
Според тврдењата на СДСМ, во локалната самоуправа постои внатрешен сомнеж за трошењето на буџетските средства во неколку општински сектори.
„Очигледно и самиот градоначалник се сомнева во работењето на кадрите од сопствените редови, особено кога станува збор за финансиски малверзации и сомнителни трошења на народните пари.“
Димова потсети на низа претходни случаи кои беа актуелни во јавноста, нагласувајќи дека досега нема никаква разрешница или институционална одговорност.
„Јавноста добро ги памети скандалите што ја потресоа општината:– кражбата на нафта тешка 18 милиони денари, сомнителните набавки на опрема и реквизити во градинката Астибо, како и бројните индиции за нерегуларности во работењето. Но, едно останува заедничко за сите овие случаи , никој досега не понесе одговорност.“
Од партијата потенцираат дека и покрај одвоените милионски суми за помош од општинската каса, состојбата во детските установи останува нејасна.
„Дека се аздисува со парите на граѓаните по институциите, доказ е и финансиската помош од речиси 10 милиони денари за детските градинки од парите на граѓаните.“
На крајот, советничката упати јавно прашање до првиот човек на општина Штип за финансискиот биланс по поскапувањето на услугите за престој.
„Јорданов е должен јавно да одговори за какви сомнежи на финансиски криминал се работи? Каква е финансиска состојба во градинките и покрај зголемените цени за престој во нив?“