Времето денеска на повеќе места во земјава ќе биде нестабилно со пороен дожд, грмежи и засилен ветер, соопшти Управата за хидрометеоролошки работи (УХМР). Според синоптичарите, локално процесите ќе бидат поинтензивни и ќе се појават во форма на невреме со пообилен пороен дожд, електрични празнења, како и со силен ветер чија брзина ќе надминува 60 километри на час, а постојат и услови за појава на град. Минималната температура ќе се движи во интервал од 8 до 18, додека максималната ќе достигне од 19 до 29 степени.
Во Скопје времето ќе биде променливо облачно со сончеви периоди, но во делови од котлината ќе биде нестабилно со пороен дожд, грмежи и засилен ветер. Ќе дува умерен, а во делови од котлината повремено засилен ветер од северен правец. Минималната температура во главниот град ќе се спушти до 11, а максималната ќе достигне до 25 степени.
Од УХМР најавуваат дека променливо облачното време ќе се задржи и во следните денови, проследено со умерен до засилен ветер од северен правец кој ќе достигнува брзина над 50 километри на час. Нестабилноста со пороен дожд, грмежи и засилен ветер ќе продолжи на повеќе места и во текот на викендот, кога локално повторно се очекуваат поинтензивни процеси во форма на невреме. Стабилизација не се очекува ниту на почетокот на следната седмица, па така во понеделник ќе има изолирана појава на пороен дожд и грмежи.