Градоначалникот Тони Коњановски ја извести јавноста дека Општина Битола веднаш стапила во контакт со надлежните државни органи по серијата пријави за појава на мечка во градот и околината. Реакцијата уследи по видеото кое масовно се споделува на социјалните мрежи, а во кое јасно се гледа дивото животно.
Коњановски потврди дека се активирани сите безбедносни и инспекциски служби во земјата.
„Како градоначалник на Битола и во име на Општина Битола Ве информирам дека во врска со случајот на појава на мечка што можеше да се види на видео споделено на социјалните мрежи, контактирав и ги информирав Центарот за управување со кризи, Министерството за внатрешни работи, како и државниот инспекторат за шумарство и ловство при Министерството за земјоделие, шумарство и водостопанство и Агенцијата за храна и ветеринарство.“
Жителите од неколку битолски села веќе со денови алармираат за присуството на мечката, а последната пријава стигнала во текот на денешниот ден од самиот град.
„Деновиве има повеќе пријави до институциите за мечка во атарот на селата Трн, Оптичари, Поешево и Егри, а последната пријава на бројот 112 во Центарот за управување со кризи е од денешните рани утрински часови за мечка видена во околината на градскиот парк во Битола.“
Според првичните повратни информации, државните служби веќе ги преземаат потребните чекори на терен.
„Од страна на институциите бев известен дека во тек се со актуелната состојба.“
На крајот, првиот човек на Битола потсетува дека регионот и претходно се соочувал со слични проблеми кои предизвикале материјални штети, но потенцира дека законските рамки мора да се почитуваат.
„Изминатите години во овој регион исто така имало пријави и случаи каде биле нанесувани материјални штети од мечки кои согласно законите се под трајна заштита.“