Градоначалникот на Градишка, Зоран Аџиќ, изјави дека градот сега е во колапс откако делумно се сруши бетонската конструкција и оградата на мостот преку реката Сава на граничниот премин.
Инцидентот се случил во текот на ноќта, при што само поради среќни околности е избегната поголема трагедија на самиот објект.
„Околу еден часот по полноќ се случи несреќа и дефект на мостот. Пешачката лента со оградата се сруши и за среќа немаше никој таму“, изјави Аџиќ за RTRS.
Од безбедносни причини, прекуграничниот сообраќај е целосно запрен за сите категории возила и пешаци, а локалните медиуми известуваат дека сообраќајот на улицата Војводе Степе под мостот и на улицата Видовданска е исто така затворен.
„А сега имаме прослави на матурирањето и се собираа матуранти, а полицијата навреме ги затвори кафулињата во близина на мостот“, рече Аџиќ, потенцирајќи дека само среќа е што нема повредени во инцидентот.
Тој вели дека градот сега е во колапс и укажува на сериозните логистички проблеми кои настанаа на терен.
„Имаме 200 камиони кои сега треба да се пренасочат“, рече Аџиќ.
Тој, исто така, апелираше до меѓународната заедница итно да реагира за решавање на овој горлив инфраструктурен проблем.
„Новиот мост ги има сите дозволи. А сега сите ние, граѓаните и бизнисмените, зависиме од еден човек. Такво нешто нема никаде во светот“, истакна Аџиќ.
Градоначалникот нагласи дека сега е потребно итно да се отвори новиот мост и нов граничен премин за да се нормализира состојбата.
„Блокирани сме, станавме слепо црево. Ова е типично за БиХ. И меѓународната заедница треба да реагира, ако се грижи за развојот“, додаде Аџиќ.