Опозициската партија СДСМ преку официјално соопштение реагираше на политичките ставови на државниот врв,тврдејќи дека владејачката ВМРО-ДПМНЕ почнала јавно да ги прифаќа клучните меѓународни договори кои претходно остро ги критикуваше. Според СДСМ, изјавите на премиерот Христијан Мицкоски, претседателката Гордана Сиљановска-Давкова и министерот Тимчо Муцунски се директно признание за исправноста на претходните политики.
Опозицијата ги повика функционерите од власта јавно да се извинат за досегашните наративи во јавноста.
„Лагите на Мицкоски и ВМРО-ОКГ дека СДСМ се предавници и дека Преспанскиот договор е закана за македонскиот идентитет се потврдени. Прво Христијан Мицкоски призна дека Преспанскиот договор е ремек-дело на дипломатијата. Потоа Тимчо Муцунски призна дека НАТО е феноменална работа. Сега и претседателката Гордана Сиљановска Давкова призна дека прашањето за македонскиот јазик, култура и национален идентитет е апсолвирано. Сите тројца, еден по еден, ја потврдија вистината што СДСМ ја зборуваше години наназад.“
Во соопштението се потенцира дека по дебатата за идентитетот, сега е време власта да направи исчекор и во однос на евроинтегративниот процес преку вклучување на малцинствата во највисокиот правен акт.