Принцот Вилијам, денешниот принц од Велс, со години растел пред камерите и под будното око на папараците кои го следеле на секој чекор. Сепак, кога пристигнал на престижниот Универзитет Сент Ендрус во Шкотска, тој се обидел да го направи она што е вообичаено за повеќето студенти, а речиси невозможно за него – да живее барем малку анонимно. Како што открива кралскиот биограф Роберт Џобсон во својата книга „Катерина, принцезата од Велс“, принцот меѓу колегите и пријателите се претставил едноставно како Стив, иако официјално на универзитетот бил регистриран под името Вилијам Велс. На овој начин, тој се обидел да „оди под радарот“ и да го избегне постојаниот медиумски притисок.
Вилијам пристигнал во Сент Ендрус во 2001 година, а поради огромниот јавен интерес, универзитетот морал да најде начин да ја заштити неговата приватност, но и мирот на останатите студенти. Така се родил неформалниот „Договор на Сент Ендрус“ со британските медиуми, според кој новинарите и фотографите се обврзале да го остават принцот на мира за време на студиите, во замена за повремени можности за официјално фотографирање и интервјуа. Поранешниот канцелар на универзитетот, д-р Брајан Ланг, подоцна потврдил дека целта била да се одржи животот на академската заедница што е можно понормален. Токму во една ваква заштитена средина, Вилијам ја запознал и својата идна сопруга, Кејт Мидлтон.
Лажното име Стив не било единствениот обид на двојката да ја зачува својата приватност. Според пишувањата на списанието „Пипл“, додека биле во врска, тие повремено користеле и други имиња за да избегнат несакано внимание. Биографот Џобсон наведува дека за време на одредени патувања во хотелите се пријавувале како г-дин и г-ѓа Смит, иако ретко кој навистина бил измамен од тоа презиме. Исто така, странските медиуми претходно пишуваа дека за време на одморот на Сејшелите, тие престојувале под имињата Мартин и Роуз Мидлтон, што е вообичаена пракса за членовите на кралското семејство во приватни околности.