Министерот за транспорт и врски, Александар Николоски, ја објави првата фотографија од галеријата која е изградена на автопатот Охрид – Кичево. Станува збор за решение со кое треба да се санираат проблематичните косини на оваа делница.
Во изминатиот период на овој патен правец беа извршени дополнителни геоистражни работи на новите свлечишта. Врз основа на тие податоци беа изработени основни проекти за стабилизација на вкупно 14 точки.
Стабилизацијата се изведува во вид на т.н. галерии, кои според министерот се сериозен градежен предизвик.
„Галериите се исклучително комплициран инженерски потфат со кој се решава проблемот со свлечиштата на автопатот Охрид – Кичево“, истакна Николоски.
Тој во својата објава порача дека работите на терен продолжуваат со цел конечно завршување на овој стратешки проект.
„Продолжуваме да ја градиме Македонија“, додава министерот.