Студен бран проследен со снежни врнежи ја зафати Европа среде месец мај. Според информациите од метеорологот Славчо Попоски, во Германија денеска, 12-ти мај, е регистрирана снежна бура, а истиот овој ладен фронт веќе се спушта кон подрачјето на Балканот.
Промената на времето кај нас се очекува да настапи до крајот на денешниот ден. Како што најавува Попоски, температурите нагло ќе опаднат, а на повисоките предели се очекуваат и врнежи од снег.
„Ладниот бран се спушта кон Балканот и до вечерва ќе донесе снег на планините а температурите нагло ќе опаднат и за повеќе од 15 степени“, стои во неговата прогноза.
Овој екстремен температурен пад ќе услови вистинска зимска слика на планините, додека во останатите делови се очекува значително заладување кое ќе ја прекине досегашната пролетна атмосфера.