Денешното претпладне ќе биде одбележано со променлива облачност и сончеви периоди, но попладне се очекува дестабилизација. Според најавите на Управата за хидрометеоролошки работи, ќе има локална појава на краткотраен пороен дожд, грмежи и засилен ветер.
Западниот ветер на моменти ќе достигнува брзина и над 80 километри на час. Температурите ќе се движат во интервал од минимални 7 до максимални 31 степен.
Во Скопје времето ќе биде слично – претпладне со сончеви периоди, а попладне со услови за пороен дожд и грмежи. Во главниот град ќе дува слаб до умерен ветер, со минимална температура до 10 и максимална до 28 степени.
УХМР најавува краткотрајно смирување во среда, кога ќе преовладува променливо облачно време со услови за слаб локален дожд. Сепак, од петок и во текот на викендот повторно се очекува поголема нестабилност.
„Наместа процесите ќе бидат поинтензивни во форма на невреме со интензивен пороен дожд, силни електрични празнења, ветер и услови за појава на град“, соопштуваат од Управата.