Тешка сообраќајна несреќа со фатални последици се случи попладнево во Росоман, во која животот го загуби 89-годишен пешак. Трагедијата за МИА ја потврди портпаролката на СВР Велес, Ана Милевска Ѓеоргиева.
Според полициските информации, несреќата била пријавена во 18:55 часот на регионалниот пат Градско-Прилеп.
„Денеска во ОВР – Кавадарци пријавено е дека во 18:55 часот на регионален пат Градско-Прилеп, во Росоман, товарно возило „сканиа“ со кавадаречки регистарски ознаки со приколка управувано од Р.Љ., на возраст од 45 години од Кавадарци, удрило во пешак К.Ѓ., на 89-годишна возраст од Росоман“, појасни Милевска Ѓеоргиева.
Од силината на ударот, пешакот починал на самото место, а смртта била констатирана од страна на лекар од Итната медицинска помош од Кавадарци.
За несреќата веднаш бил известен јавен обвинител, а увидна екипа од ОВР Кавадарци во моментов врши увид на местото на настанот за да се утврдат причините за трагедијата.
Поради несреќата, сообраќајот на овој патен правец е во целосен прекин и возилата се пренасочуваат по околните регионални правци.